Flestir ferðamenn láta sér nægja að skoða er miðbæjarkjarninn kringum Miðbæjarlestarstöðina, Amsterdam Central, en það er ennfremur elsti hluti borgarinnar. Heil fimm síki umkringja þennan kjarna; Singel, Herengracht, Keizergracht, Prinsengracht og Singelgracht en þau voru fyrr á öldum hluti af varnarvirki borgarinnar. Gaman er að rölta meðfram síkisbökkum, fá sér kaffi og njóta augnabliksins og horfa á mannlífið. 

 

Áhugaverðir staðir 

Demantasafnið - Holland er eitt af fimm löndum heims þar sem demantaverslun er hvað mest og er Amsterdam þar fremst meðal jafningja. Á þessu safni er saga demanta rakin og fjölmargir dýrgripir tengdir demöntum til sýnis. Einnig er hægt að versla demanta í safninu. 

Hús Rembrandt– Heimili listmálarans heimsfræga og margt ber þarna fyrir augu. Meðal annars fjöldi teikninga hans og skissa og farið gegnum ævi hans og feril allan.  

Hús Önnu Frank – Sennilega frægasta safn Hollands að Ríkissafninu frátöldu. Allir þekkja Önnu og þann harm sem hún og fjölskylda hennar varð fyrir í Seinni heimsstyrjöldinni. 

Kannabissafnið - The Hash, Marihuana & Hemp Museum). Nema. Vinsælt safn um þessa umdeildu plöntu og afurðir hennar. Safnið stendur í Rauða hverfinu við Oudezijdsachterburgwalstræti.  

Van Gogh safnið – Safn tileinkað þessum einstaka listamanni Hollands. Þónokkur af verkum hans er hér að finna þó þau allra frægustu séu annars staðar. Hér má þó líta augum verk á borð við Sólblómin og Kartöfluátvöglin.  

Ríkissafnið (Rijksmuseum) – Stærsta og merkilegasta safn í Hollandi öllu og í hópi bestu listasafna heims. Hér eru verk allra hollensku meistaranna auk þúsunda annarra merkisverka 

Rauðahverfið er í Amsterdam er í rauninni 3 hverfi, De Wallen, Singelgebied og Ruysdealkade. Hvort sem siðprúðum líkar betur eða verr eða þrátt fyrir aragrúa góðra safna og afþreyingar um alla borg er Rauða hverfið í dag og hefur alltaf verið vinsælasta hverfi ferðamanna að heimsækja. Þetta er elsta hverfi borgarinnar og mikil saga við hvert fótmál í bland við berbrjósta stúlkur víðsvegar í gluggum. 

Markaðir- fyrir þá sem hafa gaman af því að fara á markaði verða ekki vonsviknir, en í Amsterdam eru aragrúi af allskonar mörkuðum. 

Waterlooplein Markt er flóamarkaður sem toppar alla aðra flóamarkaði og í Amsterdam er einnig markaðir sem eru tileinkaðir antíkmunum, list og gömlum bókum. Albert Cuypmarkt er suðupottur krydda og litadýrðar frá mismunandi menningarheimum. Bloemenmarkt, er hinn skemmtilegi blómamarkaður.